Home of the Tongan Catholic Schools Community

Ne lava lelei 'a e fakataha mo e fili lakanga e kau ako Kolisitutuku Katolika

'a Kenipela he Tokonaki 13 'o Sepitema ni, pea na'e fili ai 'a Supileo Fotu ko e Palesiteni. Ne lava ai pe mo ha fakafeohi 'a e kau Kolisitutuku Katolika ni mo fakafiefia'i 'enau Komiti Ma'ulakanga Fo'ou. Ko ha teuteu atu pe 'eni ki hano tali e Ifi 'a e Kolisi 'Apifo'ou 'i Tisema he ta'u ni, pea mo ha to e langa pe 'a e ngaue fakakolisitutuku he Kolomu'a 'o 'Aositelelia. 'Ikai ngata ai ka 'oku to e fai e hanga atu ki he teuteu fakamanatu 'a e siupeli siliva 'o 'Apifo'ou ko hono ta'u 125 'i he 2001.

'I he fuofua fakataha ko 'eni, ne loto pe kolisitutuku ke 'ai pe Kolisitutuku Ako Katolika ko e 'uhinga tefito ko e si'isi'i 'a e kainga Tonga 'o Kenipela (900 tupu), pea na'e 'osi kamata pehe mai pe foki kimu'a, ka ne fuoloa mai 'eni hono to e piuaki mo langa'i ke hokohoko atu, tupunga pe mei ha ngaahi femo'uekina.

'Oku fai e fakaanganga foki ke fakamanatu 'a e 'Aho e Kolistutuku ni 'i Novema 'o e ta'u ni, ka 'e toki fakapapau'i atu mei he Palesiteni mo 'ene Komiti .

Ko e kau matu'otu'a he kolisitutuku ni 'i Kenipela ko Vaohi Naufahu, 'Aiona Pelesikoti, Sivi Taumoepeau, Langama Vea pea hoko hake 'a e kau to'u hifo ki lalo ko Supileo Fotu, 'Emeliana Afeaki, Soakai Afeaki mo ha ni'ihi kehe pe, pea ko e kau kolisitutuku Kelana foki 'oku ki'i tokolahi mo ia hange ko Saia Fainga'a, 'Ipolito Lasalo mo 'Oleni Palahame.

Ne ma'u foki mo ha faingamalie 'o e kainga lotu e Komunio Kenipela ni ke fai misa mai ki ai 'a Fr Setefano Mataele  'i he Sapate ne toki 'osi (21/09), lolotonga ha'ane me'a mai mei Fisi ki Sene 'i he taha pe hono ngaahi fatongia.

Ne lava e lelei 'a e ouau misa he falelotu St Thomas Aquinas 'i Chanwood, pea hoko atu ai pe ki he Rosehill Tongan Community Centre 'i Spence, ki ha talitali 'a e kainga lotu ni 'a ia 'oku Tauhi ai 'a Soakai Afeaki pea Pule Ngaue 'a Falakiko Sevele.

Ko ha ngaahi la'i 'ata 'ena 'o Fr Setefano mo e kainga lotu pea pehe ki he kau Kolistutuku Ako Katolika, Palesiteni mo e Komiti Ma'ulakanga Fo'ou, pehe mo e kau poupou.

'Oku 'asi he ta 'i lalo 'a 'Emeliana Afeaki 'i he to'omata'u teunga kulokula, hoko ai 'a Kasinga Fotu (hoa 'o Palesiteni Supileo), hoko ai 'a Kafaika (hoa 'o Finau Mataele ne faiako 'i Sangato Soane) mo ha ni'ihi kehe pe he komunio ni.

Fr Setefano Mataele 'i loto kofu hinehina. Mei hema he kau tu'u, ko Peni Tupou, Satisi Mahe, Hainesi Lavaki, Fr Setefano Mataele, Supileo Fotu (Palesiteni Kolisitutuku Katolika Kenipela), hoko mai he laine ua e kau tu'u mei mata'u 'i mui 'ia Supileo ko Soakai Afeaki (Tauhi e Komuinio pea to e Palesiteni Tongan Association of Canberra and Queanbeyan, Ma'ulakanga Komiti Kolisitutuku)), Loia Fotu, mei mui 'ia Loia ko Tu'i Langi (Ma'ulakanga Komiti Kolisitutuku), Falakiko Sevele (Pule Ngaue Komunio) sote hina mei mui.'I he kau tangutu he 'otumu'a ko Finau Mataele, Nave (Ma'ulakanga Komiti Kolisitutuku) mo ha tamaio'eki fo'ou.

'Oku kei fai e ngaue ke 'o hake e toenga e 'u la'i'ata 'o 'ai ki he'etau Gallery.....