 Kuo mou 'osi mea'i 'a e peauta'ane ta fakatafa'aki mo e peaukula ta tu'akauta 'i he loto fale 'o e To'uako 75-80
Lalo Kasia, Kolisitutuku 'Apifo'ou mo e ngaahi Ako Katolika 'a Sene, Kenipela mo 'Aositelelia, 'a e si'i mole 'o folau hola 'a Tevita Malu Ha'apai Fifita 'o Haveluloto-Kolofo'ou pea mo Pangai Ha'apai (mei he kainga Fifita mo e Koloamatangi), ko ha ola 'o ha fakatu'utamaki he'ene fononga mei Sene ki Kenipela he Tokonaki kuo'osi (04/09/10).
Ne sifaa 'a Tevita, pea na'e 'uha lahi, 'o hoko ai 'a e fakatu'utamaki ni, ko 'ene feinga ke kalofi 'a e me'alele ne lelemu'a ai, ke 'oua 'e tau ai, ka ne sifaaa 'o tupunga ai e hoko e fakatamaki tu'upakee ni. Pea ne o atu 'a e kau Polisi ke leleaki'i ki Falemahaki Goulbourn he vaha'a ia 'o Sene mo Kenipela, kuo 'osi folau hola 'a Tevita ia.
Ko e tangata anga fakakaume'a mo fakaoli 'a Tevita, pea ne ne sa'ia ma'u pe he'ene hiki ki Kenipela 'i 'Epeleli 'o e ta'u ni ke fakafekiki tukuhua mo e ngaahi kolisitutuku kehe, ko e taukave'i ai pe 'a e Lalo Kasia mo 'Apifo'ou, pea pehe ki he taukave'i e kalapu Fofo'anga ko e kalapu toto atu taha mo fakalata taha, he na'e kau 'ene ongo fa'etangata 'e ua, Semisi mo Saimone Koloamatangi, mo e tamai 'e taha, Sione Fifita (aka. Satana) he kamata 'o e Kalapu 'eiki ni.
Ka e kehe kuo fakamahino mei he famili mo e kainga 'o Tevita, ta'okete ko Soane Fifita mo Clive Pelesikoti pehe ki he uitou uafi 'ofeina, Savelina 'e 'apo pe 'a e sino 'o e pekia 'i honau palokia 'i Mt Druitt 'i Sene he po Falaite (17/09/10), pea fai he 'aho Tokonaki (18/09/10). Ka to e ai ha liliu 'e toki fakahoko atu.
'Oku 'oatu ai pe heni mo e kaunga mamahi kia Brenda 'Ofa he mole ko ia 'ene fine'eiki 'i Tonga.
Ketau hufaki'i 'a Tevita mo hono famili, ka e teutefito ki hono laumalie, pea pehe ki he fine'eiki 'a Brenda, 'ofa ke tapuekina kinaua 'e he laumalie 'ofa 'o e kau Sangato mo e Sangata, pea pehe ki he'etau fa'e 'ofeina ko ia ko Malia.
|
Dictionary 
